Tarehe : May 25, 2023, 12:36 p.m.

Viongozi Madini Washiriki Warsha ya Utambuzi wa Madini

Dar Es Salaam

Viongozi kutoka Wizara ya Madini pamoja na Taasisi ya Jiolojia na Utafiti wa Madini Tanzania ( GST) leo tarehe 24 Mei 2023, wamekuwa miongoni mwa wataalam wanaoshiriki katika warsha ya Siku mbili ya Utambuzi wa Asili ya Madini (Analitical Fingerprint).

Masuala ya utambuzi wa asili ya madini yanasaidia kufahamu uasili wa madini ya metali kutoka mgodi na nchi yanakochimbwa ikiwa ni mojawapo ya mikakati ya udhibiti biashara haramu ya madini.

Warsha hiyo inayofanyika katika Hotel ya Bahari Beach jijini Dar Es Salaam imeandaliwa na Jumuiya ya Nchi za Ukanda wa Maziwa Makuu (ICGLR) na Shirika la Maendeleo la Ujerumani (BGR).

Mbali na washiriki kutoka Tanzania, washiriki wengine wanatoka katika nchi za Burundi, DRC, Rwanda na Uganda. Aidha, Sekretariati ya ICGLR kutoka nchini Burundi, mwakilishi kutoka African Minerals and Geosciences Centre (AMGC) na wawakilishi kutoka BGR wanashiriki warsha hiyo.

Katika warsha hiyo, Wizara imewakilishwa na Mtendaji Mkuu wa GST, Dkt. Mussa Budeba, Mkaguzi Mkuu wa Ndani kutoka Wizara ya Madini Bw. Mathias Abisai na Mkurugenzi wa Huduma za Jiolojia kutoka GST Dkt. Ronald Massawe.

by: madini