Tarehe : July 9, 2024, 9:59 p.m.

Shirikisho la Vyama vya Wachimbaji Wadogo wa Madini Tanzania (FEMATA) limeishukuru Serikali kwa juhudi zake za kuwatengenezea mazingira bora yenye kuleta tija zaidi katika shughuli za uchimbaji mdogo na masoko ya uhakika. 

Hayo yameelezwa leo Julai 9, 2024 na Rais wa FEMATA John Bina alipotembelea banda la Wizara ya Madini na Taasisi zake katika Maonesho ya 48 ya Biashara ya Kimataifa ya Dar es Salaam (DITF) maarufu kama Sabasaba yanayoendelea katika Viwanja vya Mwalimu Nyerere Jijini Dar es Salaam. 

Amesema kwamba hatua ambazo zimekuwa zikichukuliwa na Serikali kupitia Wizara ya Madini zimeleta mabadiliko makubwa katika sekta ya madini nchini sambamba na kuleta tija kubwa kwa kundi la Wachimbaji Wadogo. 

Ametaja mafanikio yaliyopatikana kuwa ni pamoja na kuongezeka kwa Leseni ambapo Serikali imeongeza idadi ya leseni za uchimbaji madini kwa wachimbaji wadogo na hivyo kurahisisha shughuli zao sambamba na Usimamizi mzuri wa Masoko ya Madini na vituo vya kununulia madini ambayo imewasaidia kupata soko la uhakika kwa bei ya soko la dunia na kuongeza uwazi na kudhibiti utoroshwaji wa madini.

Bina ameongeza kuwa, Wizara ya Madini na STAMICO kwa kushirikiana na taasisi za kifedha, zimewezesha wachimbaji wadogo kupata mikopo yenye riba nafuu ili kuboresha vifaa na teknolojia wanayotumia pamoja na kukuza mitaji yao.

Vile vile, amesema kuwa  Serikali kupitia STAMICO imewapatia Wachimbaji hao mashine za uchorongaji ambazo zinawasaidia kurahisisha shughuli zao sambamba na kuongeza ufanisi na kuokoa gharama kubwa waliyokuwa wakitumia hapo awali katika uzalishaji. 

Bina ambaye ameambatana na Viongozi wa FEMATA ameongeza kuwa juhudi hizo za Serikali zimechangia kwa kiasi kikubwa katika kuboresha maisha ya wachimbaji wadogo na kuchangia ukuaji wa sekta na hatimaye mchango wao katika Pato la Taifa. 

Pia, Rais huyo wa FEMATA ameiomba Serikali na wadau wa sekta ya madini kuendelea na juhudi hizo na kuahidi ushirikiano wao wa dhati ili kufanikisha malengo ya maendeleo endelevu katika sekta ya madini nchini Tanzania.

by: madini