Tarehe : July 11, 2024, 3:26 p.m.

Wananchi wanaotembelea Maonesho ya 48 ya Biashara ya Kimataifa (Sabasaba) yanayoendelea jijini Dar es Salaam wavutiwa na Mkaa Mbadala wa Rafiki Briquettes unaotengenezwa  kwa kutumia madini ya makaa ya mawe na Shirika la Madini la Taifa (STAMICO) 

Kutokana na shauku hiyo wameiomba STAMICO kuongeza wigo wa usambazaji mkaa mbadala huo ndani na nje ya mipaka ya nchi  ili kuwafikia watumiaji wengi.

Akitoa maoni yake mara baada ya kupata elimu ya umuhimu wa kutumia mkaa mbadala wa mkaa utokanao na miti Bw. Isaac Katogo amesema mkaa huu ni mzuri  na ni sehemu ya kutunza mazingira  na kulinda  vyanzo vya maji.

 Naye, Bw. Emmanuel Kayoka amesema  teknolojia ya mkaa Mbadala imekuja wakati muafaka ambapo  dunia na Taifa vipo katika jitihada ya kuzuia uharibifu wa mazingira  unaotokana na ukataji miti.

"Niwapongeze STAMICO  kwa kuja na Mkaa huu ambao umelenga kuongeza chachu ya kuhamasisha utunzaji wa uoto wa asili (misitu)  na kuhakikisha mazingira yanabaki salama"  alisema Bw. Kayoka

STAMICO  imeendelea  kutumia fursa mbalimbali  kuhamasisha matumizi ya mkaa mbadala  sambamba  na kuongeza uzalishaji  kwa kusimika mitambo mikubwa miwili ya kuzalisha mkaa huo ili kuwafikia wananchi wengi zaidi.

by: madini