Tarehe : Nov. 22, 2024, 6:55 p.m.

Ujumbe kutoka Burkina Faso umetembelea Shirika la Madini la Taifa  (STAMICO) na kufanya  Kikao kazi ili kujifunza  kuhusu sekta ya madini,leo  Novemba 22, 2024

Katika kikao kazi hicho 
STAMICO imeeleza kwa kina namna serikali inavyoshiriki katika uvunaji wa rasilimali madini kwa kutoa wasilisho kuhusu inavyosimamia na kuendesha miradi yake ili kuhakikisha  inaleta tija kwa Taifa

Akiongea kwa upande wa STAMICO  Kaimu Mkurugenzi Mtendaji  Bw. Mudrikati Kiobya  amesema ili nchi iwezekunufaika na rasilimali  madini ni vizuri Serikali kushiriki kwenye uchimbaji, kuwawezesha wachimbaji wadogo ili waweze kuendeleza rasilimali hizo.

Naye kiongozi wa Ujumbe huo kutoka Burkina Faso  Bw.  HIEN Jonas, amesema  wamefanya ziara ya kujifunza kuhusu STAMICO ili kuweza kutumia uzoefu huo kufanya uwekezaji katika sekta ya madini nchini kwao. 

Ameeleza kuwa nchini kwao hawana taasisi ya Serikali  inayojihusisha na uvunaji wa rasilimali  madini bali wana taasisi tofauti zinazowasimamia wachimbaji japokuwa wameanzisha taasisi ya serikali (Refinery )kwa ajili ya kununua na kusafisha dhahabu.

Ametumia fursa hiyo kuishukuru Serikali   kupitia STAMICO kwa maelezo mazuri yaliyoendana na matarajio yao kwani wameweza kujifunza jinsi ya  kuwasaidia wachimbaji wadogo,  sambamba na kuendesha miradi ikiwemo  mradi wa kusafisha dhahabu na miradi mingine.

Utendaji bora wa STAMICO  umeendelea kuwavuta mataifa  mbalimbali  kuja kujifunza namna Serikali  inavyoweza kusimamia na kushiriki  katika  uvunaji  wa rasilimali madini  kwa manufaa ya taifa lake.

by: madini